Contactos
Información
Un espazo para entender mellor as tecnoloxías da información e as comunicacións. En colaboración co CITIC
17 OCT. 2024 · Contas de correo electrónico, en plataformas de streaming, en aplicacións do móbil... Todas e cada unha delas requiren de contrasinais para poder usar os seus servizos. Pero non vale calquera clave: ten que ter un mínimo de oito caracteres, combinar letras maiúsculas con minúsculas, que aparezan números e varios signos ortográficos... Unha longa lista de requisitos para garantir a seguridade da túa conta. Este é un dos principais consellos dos investigadores do CITIC Victor Carneiro e Fidel Cacheda, que levan máis dunha década traballando en cuestións relacionadas coa ciberseguridade. No novo episodio de O Descodificador, os científicos da UDC achegan varios consellos para non caer nas trampas da internet e avanzan o seu último proxecto, que bota man da IA para facerlle fronte á ciberdelincuencia.
19 SEP. 2024 · A antropoloxía forense é unha disciplina manual e precaria dende o punto de vista tecnolóxico. Na meirande parte das universidades e dos centros de medicina legal aínda se empregan "ferramentas doutro século". Así o describe o investigador Óscar Ibáñez Panizo, do CITIC, cuxas liñas de investigación sobre intelixencia artificial están enfocadas ás ciencias forenses. "Automatizar e simplicar tarefas, dotalas de maior obxectividade, incluso automatizalas. No ámbito da antropoloxía e odontoloxía forenses o aforro de tempo é moi claro", explica o científico no novo episodio de O Descodificador, o podcast de GCiencia en colaboración co CITIC.
27 AGO. 2024 · En Galicia hai 27.000 persoas diagnosticadas de artrite reumatoide e un 43% precisa a axuda doutra persoa para a realización de actividades cotiás. Esta é unha realidade non sempre visible. Por iso, co obxectivo de mellorar a calidade de vida e deseñar tratamentos individualizados ás necesidades de cada doente, un equipo do CITIC e do Hospital da Coruña está a deseñar un modelo de intelixencia artificial capaz de predicir se un paciente vai volver sufrir un gromo. Neste episodio de O Descodificador abordaremos en que estado está o proxecto da man das investigadoras do CITIC Amalia Jácome e Blanca Monroy.
6 JUN. 2024 · Lémbraste de O Bosque animado, sentirás a súa maxia? O renderizado das súas imaxes, é dicir, a creación das animacións a partir de modelos 3D, fíxose no Centro de Supercomputación de Galicia (CESGA). Pero ollo... A computación de alto rendemento (HPC, polas súas siglas en inglés) tamén está detrás das predicións meteorolóxicas, da rapidez con que se xestou Chat GPT e con moitas ferramentas que nos permiten simular escenarios (como os do cambio climático). Neste terceiro episodio de O Descodificador, un podcast de GCiencia en colaboración co CITIC, debullaremos en detalle as aplicacións e funcionamento dos superordenadores da man de María José Martín e Diego Andrade.
9 MAY. 2024 · O programa Talentos Inclusivos busca espertar vocacións STEM entre o alumnado de secundaria e bacharelato ao tempo que mellora a calidade de vida das persoas con parálise cerebral. Este proxecto, unha iniciativa do CITIC en colaboración con ASPACE Coruña, é o protagonista deste novo episodio de O Descodificador. Neste capítulo falaremos coa investigadora do CITIC Paula Castro, a profesora Julia Vázquez, a coordinadora e educadora social Iria Robles e o usuario Joan López.
10 ABR. 2024 · A Axencia Espacial Europea (ESA) lanzou a misión Gaia en 2013 cun obxectivo ambicioso: crear o mapa máis detallado da Vía Láctea... En tres dimensións! Nestes máis de 10 anos de funcionamento, Gaia xa observou 2.000 millóns de obxectos co obxectivo de comprender mellor a evolución da nosa galaxia. En todo este proceso, un equipo galego está a empregar intelixencia artificial para procesar axeitadamente todos os datos que recompila a misión europea. Iniciamos a segunda tempada de O Descodificador, un pódcast de Gciencia en colaboración co CITIC, da man de dous dos investigadores participantes: Xabier Pérez Couto e Lara Pallas Quintela.
27 MAR. 2024 · Cando se fala de visualización 3D e imaxes creadas por ordenador o primeiro que che vén á mente son os videoxogos. Pero a xeración de imaxes por ordenador vai moito máis alá do lecer. Ten aplicacións en practicamente todos os ámbitos que imaxines: dende a pantalla do teu móbil ata probas diagnósticas. Precisamente o oitavo e último episodio da primeira temporada de O Descodificador, o pódcast de Gciencia en colaboración co CITIC, analizará os usos científicos das imaces creadas con intelixencia artificial. Para iso contamos co investigador José Antonio Iglesias Guitián.
22 MAR. 2024 · O noso reloxo intelixente non só mide a cantidade de pasos que damos cada día, senón que os datos que recaba poden ser unha boa ferramenta científica. Os dispositivos 'wearables', xunto á medicina do sono, son os temas que abordamos no sétimo episodio de O Descodificador, un pódcast de Gciencia en colaboración co CITIC. Nesta ocasión contamos cos investigadores Diego Álvarez e Patricia Concheiro, cos que falamos sobre as aplicacións biomédicas da intelixencia artificial.
5 DIC. 2023 · A intelixencia artificial está cambiando a maneira de aprender, pero tamén a forma de ensinar. Nun escenario tecnolóxico en constante cambio, cabe reflexionar sobre os desafíos que abre Chat GPT, Midjourney e a infinidade de ferramentas de intelixencia artificial dentro do ámbito educativo. Desaparecerá a figura do profesor? Estamos ante a gran revolución da educación? Estas preguntas e moitas máis no sexto episodio de O Descodificador, un pódcast de Gciencia en colaboración co CITIC que contará coa participación do investigador Francisco Bellas.
3 NOV. 2023 · Os nesgos de xénero están en todas partes: nas series que ves, nos libros que consomes, no teu traballo... E como non podía ser doutra maneira, tamén están presentes nos sistemas de intelixencia artificial. Neste quinto episodio de O Descodificador, un pódcast de GCiencia en colaboración co CITIC, trataremos de averiguar Por que a intelixencia artificial tamén discrimina as mulleres. Os datos cos que se adestran os sistemas e a falta de diversidade nos equipos de investigación son as claves.
Un espazo para entender mellor as tecnoloxías da información e as comunicacións. En colaboración co CITIC
Información
| Autor | GCiencia Podcasts |
| Organización | GCiencia Podcast |
| Categorías | Noticias tecnológicas |
| Página web | - |
| gciencia@gciencia.com |
Copyright 2024 - Spreaker Inc. an iHeartMedia Company
